राष्ट्रिय स्वतन्त्र पार्टी (रास्वपा) का उपसभापति डा. स्वर्णिम वाग्लेले आफ्नो स्वर नक्कल गरी बनाइएको ‘डिप फेक’ अडियो सामग्री सार्वजनिक भएको भन्दै साइबर ब्युरोमा औपचारिक उजुरी दर्ता गरेका छन् ।
बुधबार दिउँसो वाग्ले स्वयं भोटाहिटीस्थित नेपाल प्रहरीको साइबर ब्युरो कार्यालय पुगेर निवेदन दर्ता गराएका हुन् ।
ब्युरोका प्रवक्ता तथा प्रहरी वरिष्ठ उपरीक्षक (एसपी) दीपकराज अवस्थीले उजुरी दर्ता भएको पुष्टि गरे ।
हालै सामाजिक सञ्जालमा नेपाल–भारत सम्बन्ध तथा सीमा समस्या सम्बन्धी विषयमा वाग्लेको नाम जोडेर विभिन्न भिडियो तथा टेक्स्ट सामग्रीहरू सार्वजनिक भइरहेका छन् । ती सामग्रीहरूमा भारतीय प्रधानमन्त्री नरेन्द्र मोदीसँग वाग्लेले संवाद गरेको जस्तो देखाइएको छ ।
वाग्लेले यस्ता सामग्रीप्रति गम्भीर आपत्ति जनाउँदै ती नक्कली र भ्रामक रहेको स्पष्ट पारेका छन् । साथै, यस्ता अफवाह फैलाउने तथा फेक सामग्री पोस्ट गर्ने व्यक्तिहरूलाई कानुनी दायरामा ल्याउन माग गरेका छन् ।
साइबर अपराधसम्बन्धी बढ्दो चिन्ताबीच वाग्लेको उजुरीले सामाजिक सञ्जालमा ‘डिप फेक’ प्रविधिको दुरुपयोग र यसको कानुनी नियमनबारे नयाँ बहस समेत चर्काएको छ ।
