नेकपा एमालेका अध्यक्ष केपी शर्मा ओली ले नयाँ वर्ष २०८३ को अवसरमा सम्पूर्ण नेपालीमा शुभकामना व्यक्त गर्दै अनुभव र युवाशक्तिबीच सार्थक सहकार्यको आवश्यकता औँल्याउनुभएको छ।
नयाँ वर्षको शुभकामना सन्देशमार्फत उहाँले सुरक्षित र समृद्ध नेपाल निर्माणका लागि ‘पाको अनुभव’ र ‘नवयुवा ऊर्जा’बीच अर्थपूर्ण सिनर्जी सिर्जना हुनुपर्नेमा जोड दिनुभएको हो।
उहाँले सामाजिक सञ्जालमार्फत लेख्नुभएको छ, “नयाँ वर्षले सुरक्षित र समृद्ध नेपालका लागि पाको अनुभव र नवयुवाको ऊर्जाबीचको सार्थक सिनर्जी सिर्जना गरोस्।”
उहाँले वर्ष २०८२ अब इतिहास बनेको उल्लेख गर्दै विगतका सफलता, विफलता, अवसर, चुनौती, कमजोरी र उपलब्धिहरूको समीक्षा गर्दै भविष्यतर्फ अग्रसर हुनुपर्ने बताउनुभएको छ।
ओलीले भन्नुभएको छ, “इतिहासको समीक्षा गर्दै र भविष्यलाई नियाल्दै, नयाँ वर्ष २०८३ ले सुरक्षित र समृद्ध नेपालका लागि पाको अनुभव र नवयुवा ऊर्जाबीच एक सार्थक सिनर्जी सिर्जना गरोस्।”
उहाँले नयाँ वर्षले देशमा स्थायित्व, समृद्धि र सकारात्मक ऊर्जा थप्ने विश्वास व्यक्त गर्दै सम्पूर्ण नेपाली दाजुभाइ तथा दिदीबहिनीमा हार्दिक शुभकामना दिनुभएको छ।
यो सन्देशलाई आगामी वर्षको राजनीतिक तथा सामाजिक सहकार्यका लागि प्रेरणादायी सन्देशका रूपमा हेरिएको छ।
