राष्ट्रपति रामचन्द्र पौडेलले सांस्कृतिक तथा ऐतिहासिक पर्वले विविध जातजाति, भाषाभाषी, संस्कृति र भौगोलिक क्षेत्रका नेपालीबीच परस्पर विश्वास, सद्भाव, सहिष्णुता र सहयोगको भावना बलियो बनाउँदै राष्ट्रिय एकतालाई सुदृढ बनाउन सहयोग पुग्ने बताएका छन्।
रामनवमीका अवसरमा स्वदेश तथा विदेशमा रहेका नेपालीलाई सुख, शान्ति र समृद्धिको शुभकामना दिँदै उनले यो पर्वले आपसी समझदारी, दिगो शान्ति र भाइचाराको भावना बढाउन प्रेरित गरोस् भन्ने कामना गरेका छन्।
हरेक वर्ष चैत महिनाको शुक्ल पक्षको नवमी तिथिमा भगवान् श्रीरामको जन्मदिनका रूपमा रामनवमी मनाउने परम्परा छ। यस दिन पूजा, व्रत, अनुष्ठान र जप गर्ने चलन रहेको छ, जसबाट मनोकामना पूरा हुने विश्वास गरिन्छ। यस्ता पर्वहरूले प्राचीन सभ्यता, धर्म र संस्कृतिको संरक्षणमा योगदान दिने विश्वास पनि व्यक्त गरिएको छ।
रामनवमीलाई भगवान् श्रीरामको जन्मदिन मात्र नभई अधर्ममाथि धर्मको विजयको प्रतीकका रूपमा पनि लिइन्छ। यस दिन देशका विभिन्न स्थान तथा जनकपुरस्थित रामजानकी मन्दिरमा मेला लाग्ने गर्दछ।
