फागुन २१ गते हुने प्रतिनिधि सभा सदस्य निर्वाचनलाई लक्षित गर्दै नेपाली कांग्रेसले पोखरामा चुनावी सभा गर्ने भएको छ । कांग्रेस कास्कीले पोखराको अमरसिंह चौरमा शुक्रबार सभा आयोजना गर्ने भएको हो । कांग्रेस सभापति गगनकुमार थापा र उपसभापति विश्वप्रकाश शर्माले सम्बोधन गर्ने उक्त सभामा गण्डकी प्रदेशका १८ वटै निर्वाचन क्षेत्रका प्रत्यक्ष तर्फका उम्मेद्वारहरु सहभागी हुनेछन् ।
‘सभा कास्कीले आयोजना गरेको हो । तर कास्की गण्डकीको राजधानी जिल्ला हो,’ सभापति किशोरदत्त बरालले भने, ‘सबै क्षेत्रका उम्मेदवार त्यस दिन पोखरा आउनुहुन्छ ।’ सभाको तयारी अन्तिम चरणमा रहेको व्यवस्थापन समिति संयोजक दीपक गुरुङ (माइला)ले जानकारी दिए । उनका अनुसार, आमसभामा करिब १५ हजार सहभागी हुने अपेक्षा कांग्रेसले लिएको छ ।
‘गाउँगाउँबाट करिब १ सयवटा गाडीहरू आमसभामा आउँछन् । अमरसिंह चौरमा मञ्च निर्माणको काम चलिरहेको छ,’ उनले भने, ‘१५ हजार भन्दा बढी सभामा सहभागी हुने अपेक्षा हाम्रो छ ।’
बदलिएको कांग्रेसले विधि र संस्थागत प्रणालीलाई प्राथमिकता, सुशासन, पारदर्शिता र उत्तरदायित्व सहितका विषयलाई प्राथमिकतामा राखेको सभापति बराल बताउँछन् । ‘बदलिएको काँग्रेसले नारामा सीमित नभई परिणाममुखी कार्ययोजना र स्पष्ट दृष्टिकोण जनता सामु प्रस्तुत गर्ने अवसर दिन्छ,’ उनी भन्छन्, ‘हामी देश परिवर्तनको अभियानलाई सशक्त बनाउने दृढ अठोटमा छौँ ।’
