नेकपा (एमाले)ले आसन्न प्रतिनिधिसभा निर्वाचनलाई लक्षित गर्दै केपी शर्मा ओलीको उम्मेदवारी रहेको झापा क्षेत्र नम्बर ५का लागि ४२ बुँदे प्रतिबद्धता पत्र सार्वजनिक गरेको छ।
प्रतिबद्धता पत्रमा सुशासन, भ्रष्टाचार नियन्त्रण, राष्ट्र र राष्ट्रियता तथा पूर्वाधार विकासलाई मुख्य प्राथमिकतामा राखिएको छ। एमालेले सुशासन कायम गर्ने, भ्रष्टाचारमा शून्य सहनशीलता अपनाउने र पूर्वाधार विकासमार्फत आर्थिक समृद्धि हासिल गर्ने लक्ष्य लिएको जनाएको छ।
त्यसैगरी ‘सुखी नेपाली, समृद्ध नेपाल’ नारालाई कार्यक्रमकै रूपमा अघि बढाउने, अधुरा विकास आयोजना सम्पन्न गर्ने, कृषि, स्वास्थ्य, शिक्षा, सडक, खेलकुद र पर्यटन क्षेत्रको विकासलाई तीव्रता दिने प्रतिबद्धता पनि पत्रमा उल्लेख गरिएको छ। निर्वाचनपछि यी एजेण्डा कार्यान्वयनमा लैजाने एमालेको भनाइ छ।
