राष्ट्रिय प्रजातन्त्र पार्टी (राप्रपा) का महामन्त्री धवलशम्शेर राणाले पार्टीको आगामी महाधिवेशनलाई प्रभावित गर्ने कुनै पनि कार्य नगर्न नेतृत्वलाई आग्रह गरेका छन् ।
आइतबार काठमाडौंमा सञ्चारकर्मीसँग कुरा गर्दै उनले मङ्सिरमा तय भएको महाधिवेशनलाई निष्पक्ष र सहज रूपमा सम्पन्न गर्नुपर्नेमा जोड दिए । राणाले महाधिवेशनको तयारीमा कुनै बाधा-अवरोध नहोस् भन्दै सबै पक्षलाई स्वतन्त्र रूपमा प्रतिनिधि छनोट गर्ने वातावरण बनाउनुपर्ने बताए ।
उनले पार्टी नेतृत्वले एकलौटी रूपमा नेता-कार्यकर्तालाई हटाउने र स्पष्टीकरण सोध्ने कार्यले देशभरका राप्रपा कार्यकर्तामा चिन्ता पैदा भएको उल्लेख गरे । ‘पार्टी विधानविपरीत एकपक्षीय निर्णयले समस्या निम्त्याएको छ,’ उनले भने, ‘महाधिवेशनको मुखमा यस्ता कार्यले कार्यकर्ताको मनोबल कमजोर हुन्छ ।’
राणाले राप्रपालाई कुनै पनि हालतमा फुट्न नदिने प्रतिबद्धता व्यक्त गरे । नेतृत्वका विषयमा मतभेद भए पनि पार्टी विभाजन गरेर अघि बढ्ने कुनै मनसाय नरहेको उनको भनाइ छ । ‘अध्यक्ष पार्टीको अभिभावक हो, सबैलाई मिलाएर अघि बढ्नुपर्छ,’ उनले भने, ‘एकलौटी निर्णय स्वीकार्य हुँदैन ।’
उनले महाधिवेशनको मिति तोक्न ढिलाइ गर्न नहुनेमा पनि जोड दिए । पार्टीको आन्तरिक एकता र विधानको पालना गर्नुपर्नेमा राणाले विशेष जोड दिए । उनले नेतृत्वले सबै पक्षलाई समेटेर पारदर्शी रूपमा महाधिवेशन सम्पन्न गर्नुपर्ने बताए ।
‘महाधिवेशन समयमै र निष्पक्ष रूपमा हुनुपर्छ, कुनै पनि पक्षलाई अप्ठ्यारो पार्ने काम गर्नुहुँदैन,’ उनले भने । राप्रपाभित्र पछिल्लो समय नेतृत्वको कार्यशैलीलाई लिएर केही असन्तुष्टि देखिएको छ ।
महामन्त्री राणाले यस्ता गतिविधिले पार्टीलाई कमजोर बनाउन सक्ने भन्दै नेतृत्वलाई सचेत रहन आग्रह गरे । उनले कार्यकर्ताको भावनालाई सम्मान गर्दै सबैलाई समेटेर अघि बढेमा पार्टी थप सशक्त हुने विश्वास व्यक्त गरे ।
