सुर्खेतमा शुक्रबार बिहानैदेखि सार्वजनिक यातायातका साधनहरू बन्द गरिएको छ । यातायात व्यवसायीहरूले वीरेन्द्रनगरस्थित बसपार्कबाट छुट्ने सवारी साधनहरू बन्द गर्ने निर्णय गरेका हुन् । जसका कारण सयौँ यात्रुहरू बसपार्कमा अलपत्र परेका छन् ।
यातायात व्यवसायीहरूले सार्वजनिक सवारीका मजदुरमाथि प्रहरीले धरपकड गरेको आरोप लगाएका छन् । साथै, निजी प्रयोजनका लागि दर्ता भएका रातो प्लेटका सवारीहरूलाई खुला छाडिएको पनि उनीहरूको भनाइ छ ।
सार्वजनिक सवारीमाथि मात्र दबाब सिर्जना गर्नु अन्यायपूर्ण भएको उनीहरुले बताएका छन् । तर जिल्ला प्रहरी कार्यालय सुर्खेतका प्रहरी नायव उपरीक्षक मोहनजंग बुढ्थापाले यात्रुहरूलाई अनावश्यक तानातान गर्ने, दुख दिनेहरूलाई नियन्त्रणमा लिएको बताए ।
‘उहाँहरूले सर्वसाधारण यात्रुहरूमाथि अनावश्यक दुख दिने, तानातान गर्ने गरेका कारण हामीले कारबाही गरेको हो,’ उनले भने, ‘यातायात बन्दको विषयमा के हो हामी छलफल गर्छौँ ।’
