चर्चित हलिउड पप स्टार रिहानाको घरबाहिर गोली हानिएको छ । क्यालिफोर्नियाको बेभर्ली हिल्सस्थित उनको निवासलाई लक्षित गरी आइतबार दिउँसो अन्धाधुन्ध गोली प्रहार भएको हो । यस घटनामा रिहाना पूर्ण रूपमा सुरक्षित रहेको प्रहरीले जनाएको छ ।
लस एन्जलस पुलिसका अनुसार यो घटना आइतबार दिउँसो करिब १ः२१ बजे भएको थियो। रिहानाको घरको गेट अगाडि सडकको अर्को छेउमा रोकिएको एउटा गाडीबाट करिब १० राउन्ड गोली चलाइएको थियो ।
लस एन्जलस टाइम्सको रिपोर्ट अनुसार, एउटा गोली घरको पर्खाल नै वारपार भएको छ। प्रहरीले तत्काल कारबाही गर्दै घटनास्थलबाटै एक ३० वर्षीया महिलालाई पक्राउ गरेको छ । गोली चलेको समय रिहाना आफ्नै घरभित्रै रहेकी थिइन् । घटना लगत्तै उनको सुरक्षा व्यवस्था कडा पारिएको छ । ती महिलाले रिहानालाई नै निशाना बनाएकी हुन् वा यसको पछाडि अन्य कुनै कारण छ भन्नेबारे प्रहरी अनुसन्धान गरिरहेको छ।
पछिल्लो समय कलाकारहरूलाई निशाना बनाउने क्रम बढेको छ। यसअघि क्यानडामा भारतीय कमेडियन कपिल शर्माको ‘क्याप्स क्याफे’ मा तीन पटक फायरिङ भएको थियो । भारतमा पनि अप्रिल २०२४ मा सलमान खानको ‘ग्यालेक्सी अपार्टमेन्ट’ र ३१ जनवरी २०२६ मा निर्देशक रोहित शेट्टीको घरमा गोली प्रहार भएको थियो।
रिहाना हालै आफ्नो व्यक्तिगत जीवनका कारण पनि चर्चामा छिन्। उनले सेप्टेम्बर २०२५ मा आफ्नो तेस्रो सन्तानलाई जन्म दिएकी थिइन् । र्यापर एएपी रकीसँगको सम्बन्धमा रहेकी रिहानाले हालै एक अन्तर्वार्तामा आफ्नो जीवन सधैँ सोचेजस्तो ढाँचामा नचल्ने बताएकी थिइन् ।
