संयुक्त अरब इमिरेट्सको रक्षा मन्त्रालयले इरानबाट भएका शृंखलाबद्ध आक्रमणबाट १ नेपालीसहित ३ जनाको मृत्यु भएको जनाएको छ ।
मन्त्रालयका अनुसार सन् २०२६ फेब्रुअरी २८ देखि सुरु भएको आक्रमणमा हालसम्म १६५ वटा ब्यालिस्टिक मिसाइल, २ वटा क्रुज मिसाइल र ५४१ वटा इरानी ड्रोनहरू प्रहार गरिएका गल्फ न्युजले जनाएको छ ।
आक्रमणका क्रममा ३ जना विदेशी नागरिकको मृत्यु भएको पुष्टि भएको छ । मृत्यु हुनेहरूमा नेपाल, पाकिस्तान र बंगलादेशका १–१ जना नागरिक रहेका छन् । आक्रमणमा परी विभिन्न १५ देशका ५८ जना व्यक्तिहरू सामान्य घाइते भएका छन् । घाइते हुनेहरूमा इमिरेट्स, इजिप्ट, इथियोपिया, फिलिपिन्स, पाकिस्तान, इरान, भारत, श्रीलंका र यमन लगायतका नागरिकहरू छन् ।
यूएईको रक्षा मन्त्रालयका अनुसार प्रहार गरिएका १६५ ब्यालिस्टिक मिसाइलमध्ये १५२ वटालाई बिचमै नष्ट गरिएको छ भने १३ वटा समुद्रमा खसेका छन् । ५४१ वटा ड्रोनमध्ये ५०६ वटालाई आकाशमै ध्वस्त पारिएको छ भने ३५ वटा ड्रोनहरू देशका विभिन्न स्थानमा खस्दा भौतिक क्षति पुगेको छ ।
आक्रमणको दोस्रो दिन आईतबार बिहान मात्रै सशस्त्र बलले २० वटा ब्यालिस्टिक मिसाइल, २ वटा क्रुज मिसाइल र ३११ वटा ड्रोनहरू नष्ट गरेको विज्ञप्तिमा उल्लेख छ । २१ वटा ड्रोनहरू भने नागरिक बस्तीका निशानामा खसेका छन् । मिसाइल र ड्रोनहरूलाई आकाशमै नष्ट गर्दा त्यसका टुक्राहरू विभिन्न स्थानमा खस्दा केही सर्वसाधारणको घर र सम्पत्तिमा सामान्यदेखि मध्यम खालको क्षति पुगेको छ ।
यूएई सशस्त्र बलले कुनै पनि खतराको सामना गर्न आफूहरू पूर्ण रूपमा तयार रहेको र नागरिक, बासिन्दा तथा आगन्तुकहरूको सुरक्षा आफ्नो उच्च प्राथमिकतामा रहेको स्पष्ट पारेको छ । मन्त्रालयले सर्वसाधारणलाई आधिकारिक स्रोतबाट मात्र सूचना लिन र अनावश्यक हल्ला वा अपुष्ट जानकारी नफैलाउन आग्रह गरेको छ ।
