जल तथा मौसम विज्ञान विभागले आज दिउँसो तथा राति देशका विभिन्न स्थानमा वर्षा तथा हिमपातको सम्भावना देखिएको जानकारी दिँदै सतर्कताका लागि चेतावनी जारी गरेको छ।
विभागले आज बिहान जारी गरेको बुलेटिनअनुसार पश्चिम वायुको प्रभावले दिउँसो सुदूरपश्चिम र कर्णाली तथा राति यी दुई प्रदेशसँगै लुम्बिनी, गण्डकी र कोसी प्रदेशमा समेत मेघगर्जन/चट्याङसहित वर्षा तथा हिमपात हुने सम्भावना छ।
दिउँसोः सुदूरपश्चिम प्रदेशका केही स्थान तथा कर्णाली प्रदेशका थोरै स्थानमा मेघगर्जन/चट्याङसहित मध्यम वर्षाको सम्भावना छ। कर्णाली प्रदेश र सुदूरपश्चिम प्रदेशका उच्च पहाडी तथा हिमाली भूभागका केही स्थानमा मध्यम हिमपातको सम्भावना छ।
राति: कर्णाली प्रदेश र सुदूरपश्चिम प्रदेशका अधिकांश स्थान, लुम्बिनी प्रदेशका केही स्थान तथा गण्डकी प्रदेशका थोरै स्थानमा मेघगर्जन/चट्याङसहित मध्यम वर्षाको सम्भावना छ। गण्डकी प्रदेश, लुम्बिनी प्रदेश, कर्णाली प्रदेश र सुदूरपश्चिम प्रदेशका उच्च पहाडी तथा हिमाली भूभागका अधिकांश स्थान तथा बागमती प्रदेशको उच्च पहाडी तथा हिमाली भूभागका थोरै स्थानमा मध्यम हिमपात/वर्षा र कोसी प्रदेशका उच्च पहाडी तथा हिमाली भूभागका एक-दुई स्थानमा हल्का हिमपात/वर्षाको सम्भावना छ। गण्डकी प्रदेश, लुम्बिनी प्रदेश, कर्णाली प्रदेश र सुदूरपश्चिम प्रदेशका एक/दुई स्थानमा मेघगर्जन/चट्याङसहित असिनाको समेत सम्भावना छ।
