काठमाडौं, २८ पुस:
नागरिक समाजका अगुवा तथा विश्लेषक डा.सुन्दरमणि दीक्षितले नेपाली कांग्रेसका सभापति शेरबहादुर देउवामाथि कडा आलोचना गर्दै कांग्रेस पार्टीको पतनको प्रमुख कारण उनी भएको आरोप लगाएका छन्।
आज (आइतबार) नेपाली रेडियो नेटवर्कको कार्यक्रममा पत्रकार ऋषि धमलासँग संवाद गर्दै डा.दीक्षितले देउवाले कांग्रेसको राजनीतिक दर्शनलाई ध्वस्त पार्दै पार्टीलाई कम्युनिष्ट सोचतर्फ उन्मुख गराएको दाबी गरे। उनले भने, “कांग्रेस भनेको सर्वैसर्वा देउवा नै देखिइसक्यो। शेरबहादुर देउवाको विकल्प हुनैपर्थ्यो। उनले कांग्रेस डुवाइसके। कांग्रेसको फिलोसफी डुबाइसक्यो। कांग्रेसलाई भाइ कम्युनिष्ट बनाइसक्यो।”
शेखर कोइराला नै विकल्प
डा.दीक्षितका अनुसार, देउवाको नेतृत्वले पार्टीलाई गलत दिशामा धकेलेकोले विकल्पमा डा.शेखर कोइरालाजस्ता नेताले पार्टीको बागडोर सम्हाल्नुपर्ने समय आएको छ। उनले शेखर कोइरालाको विचार र सिद्धान्तप्रति समर्थन जनाउँदै भने, “अहिले शेखरले बागडोर सम्हाल्नुपर्थ्यो। किनभने उनले मात्रै कांग्रेसको सिद्धान्त बोकेर हिँडेका छन्।”
गगन थापामाथि पनि टिप्पणी
डा.दीक्षितले गगन थापामाथि पनि टिप्पणी गर्दै सभापति देउवाले गगनलाई उक्साउने प्रयास गरिरहेको आरोप लगाए। उनले भने, “गगन थापाले पनि कांग्रेसको सिद्धान्त बोकेको जस्तो लाग्थ्यो। तर, देउवाले उनलाई किन्न खोजिरहेको जस्तो लाग्छ। किनिन्छ कि किनिँदैन हेरौं।”
विमलेन्द्र निधि र प्रकाशमान सिंहमाथि धोका दिएको आरोप
डा.दीक्षितले शेखर कोइरालालाई पार्टीभित्रका नेताहरू विमलेन्द्र निधि र प्रकाशमान सिंहले धोका दिएको आरोप लगाए। साथै, उनले हालैका घटनाक्रमले गगन थापाले पनि शेखर कोइरालालाई साथ छाड्न खोजेको देखिएको बताए।
कांग्रेसको अवस्था चिन्ताजनक
उनले नेपाली कांग्रेसको वर्तमान अवस्थाप्रति गहिरो चिन्ता व्यक्त गर्दै पार्टीको वैचारिक धरातल र संगठनात्मक संरचनामा सुधार आवश्यक रहेको बताए।
निष्कर्ष
डा.दीक्षितको विचारमा, नेपाली कांग्रेसलाई पुनर्जीवित गर्न सक्षम, सिद्धान्तमा आधारित, र दूरदर्शी नेतृत्वको आवश्यकता छ। उनले शेखर कोइरालाको नेतृत्वलाई पार्टीलाई सही मार्गमा ल्याउन उपयुक्त ठहर गर्दै शेरबहादुर देउवाको नेतृत्वमा कांग्रेसले आफ्नो पहिचान गुमाएको स्पष्ट संकेत गरेका छन्।
(सम्पूर्ण समाचार नेपाली बहस कार्यक्रमबाट)
