आईसीसी टी-२० विश्वकप २०२६ अन्तर्गत पहिलो सेमिफाइनल खेल आज न्यूजिल्याण्ड र दक्षिण अफ्रिकाबीच हुँदैछ । फाइनलमा पुग्ने लक्ष्यसहित दुवै टोली उच्च आत्मविश्वासका साथ मैदानमा उत्रने तयारीमा छन् ।
खेल भारतको ऐतिहासिक मैदान इडेन गार्डेन कोलकातामा हुनेछ । खेल नेपाली समयअनुसार बेलुकी ७:१५ बजे शुरू हुनेछ ।
यसअघि पनि उक्त मैदानमा धेरै महत्वपूर्ण अन्तर्राष्ट्रिय खेलहरू सम्पन्न भइसकेकाले आजको प्रतिस्पर्धा रोमाञ्चक हुने अपेक्षा गरिएको छ ।
जारी प्रतियोगितामा यी दुई टोलीबीच यो दोस्रो भेट हो । प्रारम्भिक चरण पार गर्दै दुवै टोली उत्कृष्ट प्रदर्शनका आधारमा अन्तिम चारमा पुगेका हुन् । ब्याटिङ र बलिङ दुवै पक्ष सन्तुलित रहेकाले खेल कडा हुने अनुमान गरिएको छ ।
न्यूजिल्याण्डले पछिल्ला वर्षहरूमा अन्तर्राष्ट्रिय प्रतियोगितामा निरन्तर प्रभावशाली प्रदर्शन गर्दै आएको छ भने दक्षिण अफ्रिका पनि यसपटक उपाधि जित्ने लक्ष्यसहित अघि बढिरहेको छ ।
दुवै टोली उपाधि खेलमा स्थान सुरक्षित गर्ने प्रयासमा छन् ।
दोस्रो सेमिफाइनल खेल भने बिहीबार भारत र इङ्ल्याण्डबीच हुनेछ । उपाधि भिडन्त आगामी आइतबार हुने तालिका छ । दुवै टोली दुई पटकका विश्वकप च्याम्पियन हुन् ।
विश्वकपमा नेपाल भने समूह चरणबाटै बाहिरिएको थियो । नेपालले स्कटल्याण्डलाई पराजित गर्दै १२ वर्षदेखिको हारको श्रृंखला टारेको थियो भने इङ्गल्याण्डमाथि प्रभावशाली प्रदर्शन गर्दै केवल चार रनले पराजित भएको थियो ।
इटाली र वेष्ट इन्डिजसँग भने नेपालले खराब प्रदर्शन गरेको थियो ।
