ब्याजदर घट्ने क्रम रोकियो, फागुनमा १८ बैंकको स्थिर

३० माघ, काठमाडौं । पछिल्ला महिना ब्याजदर घट्ने क्रम रोकिएको छ । वाणिज्य बैंकहरूले फागुन महिनाका लागि सार्वजनिक गरेको सूचीअनुसार १८ बैंकको ब्याजदर स्थिर रहेको छ । ग्लोबल आईएमई बैंकको ब्याजदर बढेको छ भने लक्ष्मी सनराइज बैंकको ब्याजदर घटेको छ ।

यसअघि माघ महिनामा पनि १८ बैंकको ब्याजदर स्थिर थियो । पुस महिनामा १४ बैंकको स्थिर थियो भने मंसिर महिनामा ८ बैंकले स्थिर राख्दा ११ बैंकले घटाएका थिए । विगतका महिना अत्यधिक घट्दै आएको ब्याजदर पछिल्ला २ महिनादेखि स्थिर देखिएको छ ।

समग्रमा व्यक्तिगत मुद्दती निक्षेपको औसत ब्याजदर माघ र फागुन महिनामा समान रहेको छ । बैंकहरूले फागुन महिनाका लागि व्यक्तिगत मुद्दती निक्षेपमा दिने अधिकतम औसत ब्याजदर ६.० प्रतिशत तोकेका छन्, जुन माघ महिनामा पनि ६.० प्रतिशत नै थियो ।

व्यक्तिगत मुद्दती निक्षेप दरमा स्थिरता

फागुन महिनाका लागि व्यक्तिगत मुद्दती निक्षेपमा अधिकतम ब्याजदर एनएमबी र एनआईसी एसिया बैंकले ६.६ प्रतिशत तोकेका छन्, जुन लामो अवधिका लागि हो । ५ वर्षमाथिको अवधिका लागि केही बढी ब्याजदर तोकिएको छ भने न्यून अवधिको ब्याजदर पनि कम छ ।

कर्जाको माग बढेसँगै ब्याजदर स्थिर

पछिल्लो समयमा बैंकहरूबाट जाने कर्जा रकम वृद्धि हुँदै गएको छ । यही कारण बैंकहरूले ब्याजदर घटाउन रोकेका छन् । नेपाल राष्ट्र बैंकले व्यक्तिगत मुद्दती निक्षेपको माथिल्लो सीमा र बचतको न्यूनतम ब्याजदरबीचको अन्तर बढीमा ५ प्रतिशतभन्दा धेरै हुन नहुने व्यवस्था गरेको छ । साथै, संस्थागत मुद्दती निक्षेपमा व्यक्तिगत मुद्दती निक्षेपभन्दा कम्तीमा १ प्रतिशत बिन्दुले ब्याजदर कम गर्नुपर्ने व्यवस्था छ । व्यक्तिगत रेमिट्यान्स मुद्दतीमा भने १ प्रतिशत बिन्दु बढी ब्याज दिन सक्ने व्यवस्था छ ।

बैंकिङ प्रणालीमा अधिक तरलता कायमै रहेकाले ब्याजदर स्थिर रहेको अनुमान गरिएको छ । आगामी केही महिनासम्म पनि ब्याजदर प्रायः स्थिर रहने विश्लेषकहरूको अनुमान छ ।

नेपाल राष्ट्र बैंकको तथ्यांकअनुसार चालु आर्थिक वर्ष साउनदेखि पुस मसान्तसम्म कुल २ खर्ब ६५ अर्ब ५६ करोड रुपैयाँ कर्जा प्रवाह भइसकेको छ ।

फागुन महिनाका लागि बैंकहरूले व्यक्तिगत मुद्दती निक्षेपमा तोकेको अधिकतम ब्याजदर:

ब्याजदर स्थिर भए पनि बैंकहरूको कर्जा प्रवाहमा वृद्धि भएकाले निकट भविष्यमै कुनै ठूलो परिवर्तनको सम्भावना कम देखिन्छ ।