नेपाल उद्योग वाणिज्य महासंघको साधारण सभा तथा निर्वाचन नयाँ मितिमा तय गरिएको छ। उच्च अदालत पाटनको अन्तरिम आदेशपछि स्थगित भएको ६०औँ वार्षिक साधारण सभा तथा निर्वाचन आगामी वैशाख २१ र २२ गते गर्ने निर्णय गरिएको हो।
शुक्रबार बसेको महासंघको पदाधिकारी बैठकले अदालती विषयमा कानुनी परामर्श गर्दै नयाँ मिति तोकेको जनाएको छ। बैठकको निर्णय अनुमोदनका लागि वैशाख ९ गते केन्द्रीय (कार्यकारिणी) समितिको बैठक बोलाइएको छ।
यसअघि चैत २९ र ३० गतेका लागि तय गरिएको साधारण सभा तथा निर्वाचन उच्च अदालत पाटनको आदेशले रोकिएको थियो। बस्तुगततर्फको सदस्य पेट्रोलियम ढुवानी महासंघको उजुरीपछि अदालतले अन्तरिम आदेश जारी गर्दै कार्यक्रम स्थगित गरेको थियो।
