नेपाली कांग्रेसका नेता अर्जुननरसिंह केसीले निर्वाचनको हार वा जितकै आधारमा मात्र नेतृत्वको परीक्षण गर्नु गलत हुने बताएका छन्।
शुक्रवार पार्टी केन्द्रीय कार्यसमितिको बैठकअघि सञ्चारकर्मीसँग कुरा गर्दै उनले यस्तो धारणा राखेका हुन्। केसीले पार्टी सभापति गगनकुमार थापाको राजीनामा गलत भएको टिप्पणी गर्दै अहिलेको अवस्थामा नेतृत्वले जिम्मेवारी छोड्नु उपयुक्त नहुने बताए ।
उनले पार्टी र मुलुक बदल्ने प्रतिबद्धतासहित मैदानमा आएको नेतृत्वले बीचमै जिम्मेवारी छोड्न नहुने तर्क गरे । साथै उनले निर्वाचनको परिणामबाट आत्तिन नहुने भन्दै पार्टी कार्यकर्तालाई संयम रहन आग्रह गरे।
केसीले राष्ट्रिय स्वतन्त्र पार्टीप्रति पनि सकारात्मक धारणा व्यक्त गर्दै स्थिरता, समृद्धि र विकासका लागि काम गर्न आग्रह गरे। लोकतन्त्रको संरक्षणमा कांग्रेसले आवश्यक सहयोग गर्ने उनकाे भनाइ थियो ।
उनले पार्टीका दीर्घकालीन समस्या रातारात समाधान हुन नसक्ने उल्लेख गर्दै ५० दिनको छोटो अवधिमा जादुई परिवर्तन खोज्नु व्यवहारिक नहुने बताए ।उनले थापाको नेतृत्वको आवश्यकता अझै रहेको पनि स्पष्ट पारे ।
उनले भने, “हारबाट आत्तिनुपर्ने अवस्था छैन । जनमत प्राप्त गरेर आएका साथीहरूलाई शुभेच्छा छ । स्थिरता, समृद्धि र विकास दिनुहोस्, लोकतन्त्रको संरक्षणमा जहाँ आवश्यक हुन्छ हामी साथमा छौँ । एक चुनावको हार–जितबाट नेतृत्वको मूल्याङ्कन गर्नु गलत हुन्छ । ५० दिनमै वर्षौँदेखि थुप्रिएका समस्या समाधान हुन सक्दैनन् । म गगनजीले राजीनामा गर्नु उचित ठान्दिनँ । ठूलो जिम्मेवारीमा आएको नेतृत्वले बीचमै छोड्नु मिल्दैन ।”
पार्टी केन्द्रीय कार्यालय सानेपामा जारी बैठकमा सभापति थापाको राजीनामा र प्रतिनिधिसभा निर्वाचन परिणामबारे छलफल भइरहेको छ ।
