काठमाडौँ संघीय संसदअन्तर्गत राष्ट्रिय सभाको बैठक आज दिउँसो सवा १ बजे बस्दैछ। बैठकका लागि संसद सचिवालयले विभिन्न महत्वपूर्ण कार्यसूचीहरू तय गरेको छ। आजको बैठकमा विशेष गरी कानून, न्याय तथा संसदीय मामिला मन्त्रालयसँग सम्बन्धित मौखिक प्रश्नहरूको सम्बन्धित मन्त्रीले उत्तर दिने कार्यक्रम रहेको छ।
यसैगरी, विधायन व्यवस्थापन समितिकी सभापति तुलसाकुमारी दाहालले ‘सामाजिक सञ्जाल विधेयक, २०८१’ सम्बन्धी समितिको प्रतिवेदन सभा समक्ष पेश गर्नेछिन्। पछिल्लो समय सामाजिक सञ्जालको नियमनबारे चासो बढिरहेका बेला यो प्रतिवेदनलाई महत्वका साथ हेरिएको छ।
बैठकमा संस्कृति, पर्यटन तथा नागरिक उड्डयन मन्त्री अनिलकुमार सिन्हाले विधायन व्यवस्थापन समितिको प्रतिवेदनसहित ‘पर्यटन विधेयक, २०८१’ माथि छलफल गरियोस् भन्ने प्रस्ताव प्रस्तुत गर्नेछन्। छलफल सकिएपछि उनले सोही विधेयकलाई पारित गरियोस् भन्ने प्रस्ताव समेत पेश गर्ने कार्यसूची रहेको छ।
पर्यटन क्षेत्रलाई थप व्यवस्थित र आधुनिक बनाउने लक्ष्य राखिएको यो विधेयक आजै पारित हुने सम्भावना छ। यसका साथै, बैठकको सुरुवातमा राष्ट्रिय सभाका अध्यक्षले पूर्वसदस्य शुक्रराज संयोकको निधनमा शोक प्रस्ताव प्रस्तुत गर्नेछन्। शोक प्रस्ताव पारित भएपछि बैठकका अन्य औपचारिक एजेन्डाहरू अगाडि बढ्नेछन्।
