धादिङतर्फका सडकखण्डमा शनिबार बिहानदेखि नै पहिरो खस्दै जाँदा नागढुंगा चेकपोस्टबाट काठमाडौं बाहिरिन खोजेका सयौं सवारी साधन प्रहरीले फर्काएको छ।
प्रहरीले माइकिङमार्फत पहिरोका कारण यात्रा जोखिमपूर्ण रहेको र तत्काल बाटो खुलाउने सम्भावना नरहेको जानकारी दिँदै यात्रुहरूलाई काठमाडौंमै फर्कन अनुरोध गरेको हो।
नागढुंगा ट्राफिक प्रहरी चेकपोस्टका अनुसार बिहान साढे ९ बजेसम्ममा करिब २०० बढी गाडीहरू काठमाडौं फर्किसकेका छन्। प्रहरीले ‘धादिङका विभिन्न ठाउँमा पहिरो खसेको छ। तत्काल बाटो खुलाउन सकिने अवस्था छैन। कृपया सुरक्षित रूपमा काठमाडौं फर्कनुहोस्’ भन्दै निरन्तर माइकिङ गरिरहेको छ। यस अनुरोधलाई यात्रुहरूले सम्मान गर्दै फर्कन थालेका हुन्।
जिल्ला प्रहरी कार्यालय धादिङका अनुसार आज बिहान २ बजेतिर बेनिघाट रोराङ–१० स्थित जवाङखोलामा ठूलो पहिरो खसेपछि नागढुंगा–मुग्लिन राजमार्ग अवरुद्ध भएको थियो। प्रहरी, स्थानीय बासिन्दा र यात्रुहरूको संयुक्त प्रयासमा केहीबेरमै बाटो खुलाइए पनि करिब ६ बजेतिर माथिबाट फेरि पहिरो खस्दा दुईतर्फी ट्राफिक पूर्ण रूपमा रोकिएको छ। यो घटनाले सडकखण्डका अन्य स्थानहरूमा पनि जोखिम बढाएको प्रहरीले जनाएको छ।
यसैगरी, धादिङ र तनहुँका जोखिमयुक्त सडकहरूमा पनि बिहान ६ बजेदेखि नै सवारी सञ्चालनमा रोक लगाइएको छ। प्रहरीले शनिबार बिहानदेखि नै नागढुंगा–मुग्लिन सडकखण्डका विभिन्न भागमा पहिरो खसेको सूचना दिँदै यात्रा नगर्न आग्रह गरिरहेको छ। काठमाडौंको प्रमुख नाका नागढुंगामा तैनाथ प्रहरीहरूले यात्रुहरूलाई ‘यहाँबाट अगाडि पठाउन सकिँदैन, काठमाडौं फर्केर सुरक्षित रहनुहोस्’ भन्दै सतर्क गराइरहेका छन्।
मौसम पूर्वानुमान महाशाखाका अनुसार पछिल्लो समयको निरन्तर वर्षाले पहाडी भेगमा पहिरोको जोखिम उच्च बनेको छ। प्रहरीले यात्रुहरूलाई आवश्यकता नपरेको अवस्थामा यात्रा नगर्न र वैकल्पिक मार्गको जानकारी लिन आग्रह गरेको छ। बाटो खुल्ने प्रक्रियामा प्रहरी र सडक विभागका टोलीहरू खटिएका छन्, तर पूर्ण रूपमा ट्राफिक सुचारु हुने समयबारे भने अझै अनिश्चित छ।
