रसुवा, नेपाल – हिमाली सौन्दर्य, धार्मिक आस्था र साहसिक पदयात्राको संगम रहेको रसुवाको क्यान्जिङ उपत्यका पछिल्लो समय आन्तरिक तथा बाह्य पर्यटकहरूका लागि आकर्षणको केन्द्र बन्दै गएको छ। लाङटाङ राष्ट्रिय निकुञ्जभित्र पर्ने क्यान्जिङ गुम्बा क्षेत्र प्राकृतिक रमणीयता, सांस्कृतिक विविधता र हिमालको अद्भुत दृश्यावलोकनको लागि प्रसिद्ध छ।
लाङटाङ पदमार्गको सुरुवात
काठमाण्डौंबाट करिब ७ घण्टा लामो यात्रा पश्चात धुञ्चे हुँदै स्याफ्रुबेँसी पुगिन्छ। स्याफ्रुबेँसीबाट पदयात्रा सुरु हुन्छ। लामा होटल, लाङटाङ गाउँ हुँदै पदयात्रीहरू क्यान्जिङ उपत्यकामा पुग्छन्। करिब ३,८७० मिटरको उचाइमा अवस्थित यो उपत्यका हिमाली सौन्दर्यको खानी हो।
क्यान्जिङ गुम्बा – आध्यात्मिक आकर्षण
क्यान्जिङ उपत्यकामा अवस्थित ऐतिहासिक क्यान्जिङ गुम्बा (क्यान्जिङ मोनास्ट्री) बौद्ध धर्मावलम्बीहरूको लागि पवित्र स्थल मानिन्छ। हिमाली शैलीमा निर्मित यस गुम्बाले पर्यटकलाई आध्यात्मिक शान्तिको अनुभव दिन्छ।
प्राकृतिक सौन्दर्य र हिमालको छायाँ
क्यान्जिङ उपत्यकाबाट लाङटाङ लिरुङ (७,२३४ मि), दोर्जे लाक्पा, गान्जेन्द्रपू, किमशुंग र याला पिकलगायतका हिमालहरू स्पष्ट देखिन्छन्। यस क्षेत्रमा फोटो खिच्न चाहने पर्यटकहरूको भिड लाग्ने गरेको छ। विशेषगरी बिहान र साँझको समयमा सूर्यको किरणले हिमालमा पार्ने झलमल्ल दृश्य पर्यटकहरूका लागि अविस्मरणीय हुन्छ।
स्थानिय संस्कृति र जीवनशैली
क्यान्जिङमा तामाङ समुदायको बाक्लो बस्ती छ। उनीहरूको रहनसहन, पोशाक, भाषा र सांस्कृतिक गतिविधिहरू पर्यटकका लागि नयाँ अनुभव बन्न पुग्दछन्। यहाँको स्थानीय चीज उत्पादन केन्द्र (Yak Cheese Factory) पनि घुम्न लायक स्थलमध्ये एक हो।
पदयात्राका लागि उपयुक्त समय
मार्चदेखि मे र सेप्टेम्बरदेखि नोभेम्बरसम्मको समय क्यान्जिङ उपत्यका पदयात्राका लागि उपयुक्त मानिन्छ। यस समयमा मौसम सफा हुने भएकाले हिमाल देख्न सहज हुन्छ।
