काठमाडौं, १७ वैशाख २०८२।
शिक्षक आन्दोलनको समाधान खोज्न भन्दै आन्दोलनरत शिक्षक नेताहरू सिंहदरबारस्थित शिक्षा, विज्ञान तथा प्रविधि मन्त्रालयमा वार्ताका लागि पुगेका छन्। शिक्षा मन्त्रालयमा आज सरकारले वार्ताको दोस्रो चरण आयोजना गरेको हो।
शिक्षक महासंघका नेताहरूले हिजो (१६ वैशाख) राति भएको वार्ता सकारात्मक दिशामा अघि बढेको बताउँदै, आजको वार्ताबाट ठोस सहमति हुने अपेक्षा गरेका छन्। वार्तामा शिक्षक महासंघले प्रस्तुत गरेको ९ बुँदे प्रस्तावलाई मुख्य एजेन्डा बनाएर छलफल अघि बढाइएको छ।
९ बुँदे प्रस्ताव के हुन्?
शिक्षक महासंघले पेश गरेको ९ बुँदे प्रस्तावमा निम्न विषयहरू समावेश छन्:
- शिक्षकको आन्तरिक सरुवामा पारदर्शिता
- अस्थायी शिक्षकको स्थायीत्व सुनिश्चितता
- सेवा सुविधा र पदोन्नतिको व्यवस्था
- निजी विद्यालयका शिक्षकको हक अधिकार
- शिक्षा ऐन संशोधनमा संघसंस्थाको सहभागिता
- शिक्षकलाई करारमा राख्ने प्रवृत्तिको अन्त्य
- तलब संरचना पुनरावलोकन
- अवकाश सुविधा सुधार
- स्वतन्त्र संगठन निर्माणमा अधिकार सुनिश्चित
महासंघका अनुसार सरकार यी बुँदाहरूमा संवेदनशील बनेको छ र सम्वादमै समाधान खोज्ने प्रतिबद्धता व्यक्त गरेको छ।
आन्दोलनको पृष्ठभूमि
शिक्षकहरू २० चैतदेखि काठमाडौंमा चरणबद्ध आन्दोलनमा छन्। यस अवधिमा उनीहरूले माइतीघर मण्डलामा प्रदर्शन, जुलुस, धर्ना र अन्य दबावमूलक कार्यक्रम सञ्चालन गर्दै आएका छन्। आन्दोलनका कारण धेरै स्थानका विद्यालयमा पठनपाठन प्रभावित भएको थियो।
शिक्षकहरूले शिक्षण पेशाको गरिमा कायम राख्नुपर्ने र राज्यले शैक्षिक क्षेत्रलाई प्राथमिकतामा राख्नुपर्ने माग गर्दै आएका छन्। महासंघले वार्ताबाट सार्थक निष्कर्ष ननिस्के थप आन्दोलनका कार्यक्रम सार्वजनिक गर्ने चेतावनीसमेत दिएको छ।
आजको वार्ताबाट आशा
शिक्षक महासंघ र शिक्षा मन्त्रालय दुवै सकारात्मक रहेको सन्देश दिँदै वार्ता टोलीहरू सझदारीमा पुग्न सक्ने अवस्थामा रहेको देखिन्छ। शिक्षक नेताहरूले आजको छलफल निर्णायक हुने विश्वास व्यक्त गरेका छन्।
यदि सहमति जुट्छ भने, लामो समयदेखि जारी आन्दोलनको समाधान भई देशभरि प्रभावित पठनपाठन सामान्य अवस्थामा फर्किने अपेक्षा गरिएको छ।
नोट: समाचार अद्यावधिक भइरहेकोले अन्तिम सहमतिका बुँदाहरू प्राप्त हुनासाथ थप जानकारी समावेश गरिनेछ।
