काठमाडौं, १४ चैत २०८१ – जनक शिक्षा सामग्री केन्द्रले शैक्षिक सत्र २०८२ का लागि पाठ्यपुस्तक छपाइको काम सम्पन्न भएको जनाएको छ। नयाँ शैक्षिक सत्र १ वैशाखदेखि सुरु हुने भएकाले त्यसअघि नै विद्यालयहरूमा पाठ्यपुस्तक पुर्याइने केन्द्रका प्रबन्ध निर्देशक यदुनाथ पौडेलले जानकारी दिए।
उनका अनुसार ८ वटा क्षेत्रीय कार्यालय र केन्द्रबाट देशभरका १४ जिल्लामा पुस्तक वितरण गरिनेछ। यस वर्ष कक्षा १, २ र ४ का पाठ्यपुस्तक निजी क्षेत्रबाट छपाइ गरिएको छ भने कक्षा ३, ५, र ६ देखि १२ सम्मका पुस्तक जनक शिक्षाले छपाइ गरेको छ।
केन्द्रकी सूचना अधिकारी पार्वती न्यौपानेका अनुसार यो वर्ष १ करोड ७९ लाख १२ हजार थान पुस्तक छपाइ गर्ने लक्ष्य लिइएको थियो, जसमा हालसम्म १ करोड ६३ लाख ६६ हजार पुस्तक छपाइ भइसकेको छ। साथै, कक्षा ३ र ५ का करिब २० हजार पुस्तक अघिल्लो वर्षको स्टक बाट प्रयोग गरिनेछ।
पुस्तक वितरणको तयारी पूरा
नयाँ शैक्षिक सत्रलाई लक्षित गर्दै केन्द्रले १७ चैतदेखि पुस्तक वितरण सुरु गर्ने जनाएको छ। तालिका अनुसार १ वैशाखभित्र सबै जिल्लामा पुस्तक पुर्याउने योजना बनाइएको छ।
पुस्तक वितरण तालिका:
- कोशी प्रदेश: १३ चैतदेखि २ वैशाखसम्म
- मधेश प्रदेश: १७ चैतदेखि चैत मसान्तसम्म
- बागमती प्रदेश: १७ चैतदेखि १ वैशाखसम्म
- गण्डकी प्रदेश: १३ चैतदेखि चैत मसान्तसम्म
- लुम्बिनी प्रदेश: १३ चैतदेखि २८ चैतसम्म
- कर्णाली प्रदेश: १२ चैतदेखि २४ चैतसम्म
- सुदूरपश्चिम प्रदेश: १७ चैतदेखि चैत मसान्तसम्म
सूचना अधिकारी न्यौपानेका अनुसार यस वर्ष पाठ्यपुस्तक स्टकमा थन्किन सक्ने चिन्ता पनि रहेको छ, किनभने छपाइ कार्य शतप्रतिशत पूरा भइसकेको छ।
तीन नयाँ पाठ्यपुस्तक थपिए
यस वर्ष पाठ्यक्रम विकास केन्द्रले तीन वटा अतिरिक्त विषयका नयाँ पाठ्यपुस्तक छपाइ गरेको छ।
- अतिरिक्त गणित
- अर्थशास्त्र
- कम्प्युटर साइन्स
यी तीन विषयका पुस्तक कक्षा ९ का विद्यार्थीका लागि उपलब्ध हुने जनाइएको छ।
यसपटक अन्य पाठ्यपुस्तकमा देखिएका त्रुटिहरू पनि सुधार गरिएको केन्द्रका महानिर्देशक इमनारायण श्रेष्ठले बताए।
जनक शिक्षा सामग्री केन्द्रले समयमै पाठ्यपुस्तक उपलब्ध गराउने तयारी पूरा गरिसकेको बताएको छ। अब विद्यालयहरूले नयाँ शैक्षिक सत्र अगावै पाठ्यपुस्तक पाउनेछन्।
