काठमाडौं- रंगहरुको पर्व होली आज देशका पहाडी जिल्लाहरुमा हर्षोल्लासका साथ मनाइदै छ। फागुन शुक्ल पूर्णिमाका दिन मनाइने फागुपूर्णिमा अर्थात होली एक आपसमा रङ लगाएर मनाउने गरिन्छ। यो पर्व आपसी सद्भाव एवं सामाजिक एकतालाई प्रवर्द्धन गर्ने महत्वपूर्ण अवसर हो।
आज काठमाडौं लगायत देशका विभिन्न शहरहरुमा होली कार्यक्रमको आयोजना गरिएको छ। केही वर्षदेखि होली खेल्ने परम्परा सभ्य र सांस्कृतिक रूपमा मनाउने चलन बढ्दै गएको छ। फागु पर्वका उपलक्ष्यमा सरकारले आज सार्वजनिक बिदा दिएको छ। तराई क्षेत्रमा भने भोली होली मनाइदै छ।
होली पर्व अथवा फागु पूर्णिमा प्रत्येक वर्षको फाल्गुण शुक्ल पूर्णिमा दिनमा मनाउने हिन्दू संस्कृतिको प्रमुख उत्सव हो। हिन्दू संस्कृति अनुसार होलीको इतिहास त्रेता युगसँग जोडिएको छ। त्रेता युगमा भगवान विष्णुका भक्त प्रह्लादसंग जोडिएको होली हिरण्यकश्यपुका पुत्र प्रह्लादलाई बहिनी होलिकाले आगोमा भष्म पार्न लाग्दा होलिका आँफै आगोमा भष्म भएको पौराणिक कथन छ। त्यसैले होली खेल्ने दिनको अघिल्लो रात होलीका दहन गरिन्छ। होलीका दहन पछि बिहानै देखि विभिन्न रंगका अविर आपसमा स्नेहका साथ लगाएर होली खेल्ने गरिन्छ।
यसका साथै फाल्गुण कृष्ण पूर्णिमाका दिन मनाइने होलीका दिनबाट वसन्त ऋतुको आगमन हुने भएकाले यसलाई वसन्त उत्सवको रूपमा पनि मनाउने गरिन्छ। सबै उमेर समूहले उत्सवका साथ मनाउने होलीमा रंगहरुका साथै नाचगान र रमाइलो गर्ने पनि चलन छ। होलीलाई पुरानो कटुता समेत समाप्त गरेर आपसमा स्नेह र सद्भाव प्रारम्भ गर्ने सुखद दिनको रूपमा समेत लिइन्छ।
आज काठमाडौंका विभिन्न स्थानहरुमा सामूहिक होली कार्यक्रमहरु आयोजना गरिएका छन्। यस अवसरमा मानिसहरुले आफ्ना साथी, परिवार, र सहकर्मीहरुसँग मिलेर रंग खेल्ने, गीत गाउने र नाच्ने गरेका छन्। होलीको यो पर्वले समाजमा एकताको सन्देश दिन्छ र सबैलाई आपसमा जोड्ने काम गर्छ।
होली पर्वले मानिसहरुलाई न केवल आनन्द दिन्छ, तर यसले सामाजिक सद्भाव र एकताको पनि प्रतीक हो। यो पर्वले हामीलाई सिखाउँछ कि जीवनमा रंगहरु जस्तै विविधता हुनु स्वाभाविक छ र यी विविधतालाई आपसमा मिलाएर बाँच्नु नै सही जीवन हो।
फागु पर्वको यो पवित्र अवसरमा सबैलाई हार्दिक शुभकामना व्यक्त गर्दछौं। होलीको यो रंगीन पर्वले सबैको जीवनमा खुशी, समृद्धि र शान्ति ल्याओस्।
