विराटनगर, १४ फागुन – नेकपा (माओवादी केन्द्र) का अध्यक्ष पुष्पकमल दाहाल (प्रचण्ड) ले आफू अहिले सरकारको खेलमा नरहेको स्पष्ट पारेका छन्। विराटनगरमा आज आयोजित पत्रकार भेटघाटमा उनले आफू र आफ्नो पार्टी अहिले जनताको बीचमा फर्किएको र आफ्नै वर्गतिर ध्यान केन्द्रित गरेको बताएका छन्।
प्रचण्डले भने, “सरकार मैले भन्दा पनि सरकारमा भएका नेताहरूले नै ढल्छ भनेर भन्ने गरेको कुरालाई बेलाबेलामा संकेत गर्ने गरेको हुँ। अर्को, किन मैले ढल्छ भनेको हो भने यो सरकार जसरी गठन भएको छ, त्यो नै अस्वाभाविक छ, अप्राकृतिक छ। त्यसकारण आफ्नै बोझले सरकार ढल्छ भनेको हो।”
उनले थपे, “फाइदाको कुरा भन्नुहुन्छ भने उनीहरू ०८४ सम्म बसे पनि हामीलाई कुनै टेन्सन छैन। हामी जनताको बीचमा जान्छौँ। हाम्रो वर्गतिर, हाम्रो मुद्दा, सहिद परिवार, बेपत्ता परिवारतिर फर्किएका छौँ। त्यसले एउटा ऊर्जा पैदा भएको छ। त्यसकारण हामी सरकार अहिले ढाल्ने र बनाउने खेलमा चाहिँ बिल्कुलै छैनौँ। पत्रकार साथीहरूले यो कुरामा विश्वस्त भएर भनिदिए हुन्छ। माओवादी सरकारको खेलमा छैन।”
यद्यपि, जब प्रचण्डसँग सोधिएको थियो कि सरकार ढाल्न नसक्ने हो र? त्यसमा उनले भने, “अहिले धेरै कुरा किन भन्नु, केही समय पर्खनुपर्छ। यसबारेमा कुरा पछि गर्नेछु।”
पूर्वराजा ज्ञानेन्द्र शाहको बारेमा सोध्दा उनले भने कि ज्ञानेन्द्र शाहले भनेका कुरा कसैले उक्साएर बोलेको हो र आफूले त्यति धेरै महत्व नदिएको स्पष्ट पारे।
प्रचण्डको यो भनाइले माओवादी केन्द्रको वर्तमान राजनीतिक स्थिति र सरकारप्रति रहेको असन्तुष्टि झल्काउँछ।
