अछाममा बेपत्ता दुई किशोरीको शव फेला परेको छ । जिल्लाको ढकारी गाउँपालिका वडा नम्बर ८ का दुई किशोरी सरस्वती खड्का र ईश्वरी खड्काको शव गाउँपालिका वडा नम्बर १ मा रहेको छिन्ने जङ्गलमा फेला परेको अछामका प्रमुख प्रहरी नायव उपरीक्षक ईश्वरी भण्डारीले जानकारी दिए ।
बाख्रा हेर्न जङ्गल गएका किशोरीहरु घर नफर्किएपछि उनीहरूको खोजी सुरु भएको थियो । खोजीका क्रममा उनीहरूको शव फेला परेको हो । अलग–अलग स्थानमा किशोरीको शव फेला भन्दै डिएसपी भण्डारीले घटनाबारे प्रहरी अनुसन्धान भइरहेको जानकारी दिए ।
‘घटनास्थलमा प्रमुख जिल्ला अधिकारी सहित हामीहरू पुगिसकेका छौँ ’ उनले भने, ‘हामी अनुसन्धान गरिरहेका छौँ अहिल्यै कसरी घटना भयो भन्न सकिने अवस्था छैन ।’ तालिम प्राप्त कुकुरको उद्धतमा घटनाको अनुसन्धान भइरहेको उनले जानकारी दिएका छन् ।
