धनगढी, १३ पुष ।
नेपाली कांग्रेसकी प्रभावशाली नेतृ तथा परराष्ट्रमन्त्री डा. आरजु राणाले आफूलाई मन्त्री बन्ने कुनै योजना नभएको भए पनि परिस्थितिजन्य कारणले मन्त्री बन्न पुगेको खुलासा गरेकी छिन्।
सुदूरपश्चिममा रुडुकले आयोजना गरेको ‘सुदूरपश्चिम डायलग’ कार्यक्रमलाई सम्बोधन गर्दै उनले जलवायु परिवर्तनले महिला, युवा, र बालबालिकामा पार्ने असरबारे चर्चा गरिन्। उनले यस कार्यक्रमको आयोजना एक वर्ष अघिदेखि नै गर्न योजना भए पनि विभिन्न कारणले पर सरेको र अन्ततः आज सम्पन्न भएको बताइन्।
“म बाईचान्स मन्त्री भएँ”
कार्यक्रममा सम्बोधन गर्ने क्रममा डा. राणाले आफू मन्त्री बन्ने कुनै योजना नभएको र यसप्रकारको भूमिका आफूले कल्पना नगरेको बताइन्। उनले भनिन्,
“म अहिले बाईचान्स मन्त्री भएँ। यो प्लानिङ गर्दा म मन्त्री हुने कुनै योजना थिएन, र मलाई यस्तो हुने भन्ने सोच पनि थिएन।”
उनको यो भनाइले कार्यक्रमका सहभागीहरूको ध्यान आकर्षित गर्यो। उनले मन्त्री बन्नु आफूले भन्दा पनि परिस्थितिको देन भएको संकेत गरेकी छिन्।
चुनावमा पुनः भाग लिने घोषणा
यसअघि कैलालीबाट चुनाव लडेर पराजित भएकी डा. राणाले उक्त क्षेत्रबाटै आगामी चुनावमा पुनः प्रतिस्पर्धा गर्ने घोषणा पनि गरेकी छिन्। सुदूरपश्चिमको विकासका लागि आफू सदैव तत्पर रहेको बताउँदै उनले कैलाली क्षेत्रको समृद्धिका लागि आफ्नो योगदान जारी रहने प्रतिबद्धता जनाइन्।
जलवायु परिवर्तनको प्रभावबारे आयोजित उक्त संवाद कार्यक्रममा डा. राणाले महिला, युवा, र बालबालिकाको क्षमतावृद्धि र अवसर सृजना गर्न सरकारले विशेष ध्यान दिनुपर्नेमा जोड दिइन्।
