काठमाडौं, ३० कात्तिक
नेपालले इतिहास रच्दै आजदेखि बंगलादेशलाई बिजुली निर्यात सुरु गरेको छ। भारतको केन्द्रीय विद्युत् प्राधिकरणले अनुमति दिएसँगै भारतको बाटो हुँदै बंगलादेशसम्म बिजुली पुर्याउने त्रिदेशीय योजना सफल भएको हो।
ऊर्जामन्त्री दीपक खड्का, भारतका विद्युत् मन्त्री मनोहरलाल खट्टर, र बंगलादेशका ऊर्जा जलस्रोत मन्त्रालयका सल्लाहकार मोहम्मद फजुल कबिरले भर्चुअल माध्यमबाट यो ऐतिहासिक निर्यातको औपचारिक सुरुवात गरे।
शुक्रबारबाट प्रारम्भमा ४० मेगावाट बिजुली बंगलादेश निर्यात हुनेछ। हाललाई यो निर्यात एक दिनका लागि मात्र गरिने भए पनि नेपालले आगामी वर्षहरूमा नियमित निर्यातलाई विस्तार गर्ने लक्ष्य राखेको छ।
त्रिदेशीय सम्झौताले बाटो खोल्यो
१७ असोजमा नेपाल, भारत, र बंगलादेशका कम्पनीबीच भएको सम्झौताले यो पहललाई सम्भव बनायो। सम्झौताअनुसार, नेपालले १५ जुनदेखि १५ नोभेम्बरसम्म ४० मेगावाट विद्युत् बंगलादेशलाई निर्यात गर्नेछ।
नेपाल विद्युत् प्राधिकरणले प्रतियुनिट बिजुलीलाई करिब ८ रुपैयाँ ६४ पैसा (६.४ अमेरिकी सेन्ट) को दरले बंगलादेशलाई बिक्री गर्नेछ। बंगलादेशले भारतको प्रसारण लाइन प्रयोग गरेबापत ‘ह्विलिङ चार्ज’ तिर्नेछ।
प्राविधिक व्यवस्थापन
भारतको एनटीपिसी विद्युत् व्यापार निगम लिमिटेड (एनभीभीएन) को प्रसारण लाइनमार्फत बिजुली बंगलादेश पुर्याइनेछ।
- मुजफ्फरपुर (भारत) मा मिटर राखेर बंगलादेश पठाइएको बिजुलीको रेकर्ड राखिनेछ।
- प्रसारणको क्रममा हुने प्राविधिक नोक्सानी नेपाल र बंगलादेशले आ–आफ्नो जिम्मेवारीअनुसार बेहोर्नेछन्।
बंगलादेशसम्म पुग्दा बिजुलीको मूल्य करिब ७.६ सेन्ट पुग्ने अनुमान गरिएको छ।
नेपालका लक्ष्यहरू
नेपालले आगामी दिनमा भारतलाई १०,००० मेगावाट र बंगलादेशलाई ५,००० मेगावाट बिजुली निर्यात गर्ने योजना बनाएको छ।
यो कदमले नेपाललाई क्षेत्रीय ऊर्जा व्यापारमा महत्वपूर्ण स्थान दिलाउने मात्र होइन, आर्थिक लाभका दृष्टिले पनि कोसेढुंगा सावित हुने विश्वास गरिएको छ।
ताजा खबर
नेपालको यो ऐतिहासिक कदमबारे थप जानकारीका लागि हामीलाई फलो गर्नुहोस्।
