पोखरा – राष्ट्रिय स्वतन्त्र पार्टी (रास्वपा)का कार्यकर्ताहरूले पोखरामा गरेको आन्दोलनमा माइकिङ गर्न प्रयोग गरिएको गाडीको चाबी प्रहरीले खोसेको छ। मंगलबार पोखरामा रास्वपाका कार्यकर्ताहरूले गाडीमा स्पिकर र माइक राखेर नाराबाजी गरिरहेका थिए, जसका कारण स्थिति तनावग्रस्त बनेपछि प्रहरीले हस्तक्षेप गरी उक्त गाडीको चाबी नियन्त्रणमा लिएको हो।
जुलुसमा प्रयोग भइरहेको गाडीको चाबी खोसिएपछि रास्वपाकी सांसद सोविता गौतमले चाबी फिर्ता दिन आग्रह गर्दै प्रहरीसँग वार्ता गरिन्। उनले कार्यकर्ताहरूलाई ढुङ्गामुडा नगर्न आग्रह गर्दै शान्तिपूर्वक आफ्नो माग राख्न सुझाव दिइन्। साथै, उनले प्रहरीलाई आफ्ना स्थानमा फर्कन आग्रह गर्दै आन्दोलनको शान्तिपूर्ण प्रबन्ध मिलाउन प्रयास गरिरहेकी छिन्।
रास्वपाका कार्यकर्ताहरूले पार्टी सभापति रवि लामिछानेको रिहाइको माग गर्दै प्रदर्शन गरिरहेका थिए। निषेधित क्षेत्र तोडेपछि स्थिति झनै तनावपूर्ण बनेको थियो, जसका कारण प्रहरीले अश्रुग्याससमेत प्रयोग गरेको बताइएको छ।
रास्वपाका नेताहरूले आन्दोलन शान्तिपूर्ण भएको दाबी गरेका छन् र प्रहरीको हस्तक्षेपलाई आलोचना गरेका छन्। पार्टीले सभापति लामिछानेको रिहाइको माग राख्दै देशभर विभिन्न स्थानमा प्रदर्शन गरिरहेको छ।
