नेकपा एमालेले राष्ट्रिय स्वतन्त्र पार्टी (रास्वपा)का सभापति रवि लामिछानेको पक्राउविरुद्ध भइरहेको विरोधलाई अवाञ्छित गतिविधि भन्दै आपत्ति जनाएको छ। एमाले महासचिव शंकर पोखरेलले बिहीबार विज्ञप्ति जारी गर्दै रास्वपाको विरोधका कार्यक्रमहरू अनुसन्धान र अभियोजन प्रक्रियालाई प्रभावित गर्ने खालका रहेको र यसमा पार्टीको गम्भीर ध्यानाकर्षण भएको जनाएका छन्।
विज्ञप्तिमा सहकारी ठगी प्रकरणबारे भइरहेको अनुसन्धान र संसदीय छानबिन विशेष समितिको प्रतिवेदन कार्यान्वयन प्रक्रिया अगाडि बढिरहेको उल्लेख छ। एमालेले छानबिन र अभियोजन कार्यलाई प्रभावित गर्ने रास्वपा लगायतका व्यक्तिहरूको गतिविधिलाई अवाञ्छित भनेको छ।
संसदको सहमतिमा बनेको विशेष समितिको प्रतिवेदन सरकारलाई कार्यान्वयन गर्न निर्देशन दिइएको उल्लेख गर्दै, यसलाई रोक्न खोज्ने गतिविधि संसद र न्यायिक प्रक्रियाको उपहास भएको एमालेको ठहर छ। एमालेले सबै नागरिक, पार्टी, र संघसंस्थाहरूलाई फौजदारी न्याय प्रणालीलाई सुदृढ बनाउन सहयोग गर्न आग्रह गरेको छ।
विज्ञप्तिमा फौजदारी मुद्दा अनुसन्धान र अभियोजनलाई वैज्ञानिक र भयरहित बनाउनुपर्नेमा जोड दिइएको छ। एमालेले कुनै पनि राजनीतिक पार्टी वा व्यक्तिले कानूनी अनुसन्धान प्रक्रियामा बाधा पुर्याउनु गैरकानुनी कार्य भएको र दोषीहरूलाई बचाउन प्रयास नगर्न चेतावनी दिएको छ।
यसैगरी, प्रधानमन्त्री र जिम्मेवार व्यक्तिहरू विरुद्ध अमर्यादित अभिव्यक्ति दिनु, गालीगलौज गर्नु र गलत आक्षेप लगाउँदै भ्रम फैलाउने कार्यबाट अनुसन्धान प्रभावित भएको बताउँदै एमालेले उक्त प्रक्रियालाई जोगाउन सबैतिरको सकारात्मक सहयोगको आवश्यकता रहेको उल्लेख गरेको छ।
विज्ञप्तिमा नेपाल प्रहरीलाई अनुसन्धान र सरकारी वकिललाई अभियोजन गर्ने जिम्मेवारी दिएको संविधान र कानूनको परिपालना गर्न सबैले बाध्य रहेको बताउँदै, रास्वपाका संघीय सांसदहरूले गैरकानुनी रूपमा पाँच जना भन्दा बढीको भेला गरेको र त्यसलाई कसुरपूर्ण कार्य भनेको छ।
अन्त्यमा, एमालेले अनुसन्धान प्रक्रियामा कुनै पनि किसिमको अवरोध नगर्न सबैलाई ध्यानाकर्षण गराएको छ।
