जनकपुर–जयनगर रेलमार्गमा साढे तीन वर्षदेखि सञ्चालन हुँदै आएको नेपालको राष्ट्रिय झन्डाअङ्कित दुई वटा रेलमा यात्रुले आइतबारदेखि करिब दुई महिनासम्म यात्रा गर्न नपाउने भएका छन् । यो अवधिमा यात्रुले नेपालको झन्डाअङ्कित रेलको सट्टा पहेँलो रङका भारतीय रेलमा यात्रा गर्न पाउने भएका छन् ।
नेपाल रेल्ले कम्पनी (जनकपुर) का प्रशासन प्रमुख तुलाबहादुर डाँगीले भन्नुभयो, “नेपालको झन्डाअङ्कित रेल आइतबार बिहानै जनकपुरबाट यात्रु लिएर जयनगर जाने छन् । त्यहाँ यात्रु झारेर मर्मतसम्भारका लागि भारतको लखनउ जाने छन् । त्यहाँ करिब दुई महिनासम्म मर्मतसम्भारपछि सो रेल पुनः जनकपुर आई सञ्चालनमा आउने छन् ।”
उहाँका अनुसार सो रेलमार्गमा नेपाली रेलको सट्टा पहेँलो रङको ‘शाकुरबस्ती’ नामको भारतीय रेलले सेवा प्रदान गर्ने छ । वैकल्पिक सेवा दिनका लागि आएको भारतीय रेल अहिले नेपालको इनरुवा स्टेसनमा राखिएको छ । भारतले निःशुल्क रूपमा सो रेल पठाएको उहाँले बताउनुभयो ।
२०७६ असोजमा जनकपुर आइपुगेका भारतको कोंकण रेलवेबाट नेपालले खरिद गरेको दुई वटा रेल २०७८ चैत २० गते उद्घाटन भई सञ्चालनमा आएको थियो । नेपालले करिब ८४ करोड रुपियाँमा भारतबाट ती दुई वटा रेल खरिद गरेको थियो ।
