धादिङ –
धादिङ जिल्लाको थाक्रे गाउँपालिका–७, आठ किलो भन्ने स्थानमा गए राति ट्रिपर दुर्घटना हुँदा चालक र सहचालक घाइते भएका छन्। काठमाडौंबाट महादेवबेशी तर्फ आउँदै गरेको ना ७ ख ४६५७ नम्बरको ट्रिपर अनियन्त्रित भई करिब १० मिटर तल खसेको प्रहरीले जनाएको छ।
दुर्घटनामा परी ट्रिपर चालक मकवानपुर निवासी ४८ वर्षीय मनकाजी बल र सह–चालक १८ वर्षीय निशान ठकुरी घाइते भएका हुन्। दुबैलाई राति नै तत्काल उद्धार गरी काठमाडौँस्थित ट्रमा सेन्टरमा पठाइएको र अहिले उनीहरूको अवस्था खतरा मुक्त रहेको जिल्ला ट्राफिक प्रहरी कार्यालय, धादिङका प्रमुख प्रहरी निरीक्षक सुरज श्रेष्ठले जानकारी दिनुभयो।
घटनाको कारणबारे थप अनुसन्धान भइरहेको र सवारीको गति, सडक अवस्था वा सम्भावित ब्रेक फेलको विषयमा अध्ययन भैरहेको प्रहरी स्रोतले जनाएको छ। यस क्षेत्रलाई पृथ्वी राजमार्गको जोखिमयुक्त मोडहरूमध्ये एक मानिन्छ, जहाँ नियमितरूपमा ट्राफिक प्रहरी टोली सतर्क रहन्छ।
यस दुर्घटनापछि पुनः सडक सुरक्षामाथि चासो बढेको छ भने स्थानीय बासिन्दाले पनि जोखिमयुक्त मोडहरूमा ट्राफिक संकेत र रिफ्लेक्टर जडान गर्न माग गरेका छन्।
अधिक जानकारीका लागि सम्पर्क
धादिङ जिल्ला ट्राफिक प्रहरी कार्यालय
फोन: ०१०-५२०८००
