चितवन, २३ माघ – राष्ट्रिय स्वतन्त्र पार्टीका सभापति रवि लामिछानेको चितवन जिल्ला अदालतमा बयान सकिएको छ। साहारा चितवन बहुउद्देश्यीय सहकारी संस्थाको बचत रकम ठगी गरेको अभियोग लागेका लामिछानेको बयान आज बिहान पौने १२ बजे सुरु भएको थियो, जुन करिब चार घण्टा लामो रह्यो।
चितवन जिल्ला अदालतका सूचना अधिकारी अमृत विश्वकर्माका अनुसार लामिछानेको बयानपछि आजै थुनछेक बहस सुरु गर्ने तयारी गरिएको छ। बयान चितवन जिल्ला अदालतका न्यायाधीश दयाराम ढकालको इजलास नं. २ मा चलेको थियो।
थुनछेक बहसका लागि कानुनी टोली
थुनछेक बहसका लागि रवि लामिछानेको पक्षबाट बहस गर्ने कानुनी टोलीले आफ्नो नाम दर्ता गराइसकेको छ। लामिछानेको पक्षबाट वरिष्ठ अधिवक्ता सुशीलकुमार पन्त, अधिवक्ता सुवर्ण सापकोटा, नारायणदत्त कँडेल, चुडामणि सापकोटा, रामचन्द्र देवकोटा र सञ्जय गोलेले वकालतनामा दर्ता गराएका छन्।
त्यस्तै, सहकारी पीडितको तर्फबाट अधिवक्ताहरू राजकुमार श्रेष्ठ, रमेश काफ्ले, सुनिता अधिकारी र शम्भु बर्तौलाले बहस गर्नेछन्।
सरकारी वकिलको तर्फबाट जिल्ला न्यायाधिवक्ता रवि न्यौपानेसहित सरकारी वकिलहरू बुद्धबहादुर थापा र अमृत सुवेदीले बहस गर्ने तयारी गरेका छन्।
के हो मुद्दा?
रवि लामिछानेविरुद्ध साहारा चितवन बहुउद्देश्यीय सहकारी संस्थामा बचतकर्ताको रकम ठगी गरेको आरोप लागेको छ। सहकारी पीडितहरूले लामिछानेलाई कानुनी कारबाहीको माग गर्दै अदालतमा मुद्दा दायर गरेका थिए। अदालतमा चलिरहेको प्रक्रियाले यस प्रकरणलाई थप स्पष्ट बनाउने अपेक्षा गरिएको छ।
अब थुनछेक बहसमा अदालतले लामिछानेलाई पुर्पक्षका लागि थुनामा राख्ने वा साधारण तारेखमा छाड्ने भन्ने निर्णय गर्नेछ। बहसपछि अदालतको अन्तिम आदेश आउनेछ।
