रातारात पोखरा पुगेका रवि कास्की अदालतको आदेशविरुद्ध उच्च अदालतमा रिट हाल्दै, काठमाडौं र बुटवलमा पनि पुनरावेदन दिने तयारी शुरु हुन लागेकाे हाे।
रिपोर्टर्स नेपाल | २०८१ माघ १४, सोमबार
काठमाडौं । सुप्रिम सहकारी ठगी प्रकरणमा एक करोड धरौटी तिरेर रुपन्देही अदालतबाट छुटेका राष्ट्रिय स्वतन्त्र पार्टीका सभापति रवि लामिछाने रात्रिकालीन यात्रा गर्दै पोखरा पुगेका छन्। उनी आइतबार बुटवलबाट पोखराका लागि प्रस्थान गरेका थिए।
रुपन्देही जिल्ला अदालतका न्यायाधीश प्रह्लाद योगीको इजलासले रविलाई एक करोड धरौटीमा छाड्ने आदेश दिएको थियो। धरौटीबापत बैंक ग्यारेन्टी बुझाएपछि रवि कानूनी प्रक्रिया पूरा गरी छुटेका थिए।
कास्की अदालतको आदेशविरुद्ध पुनरावेदन
रवि लामिछानेले आज कास्की जिल्ला अदालतको आदेशविरुद्ध उच्च अदालत पोखरामा रिट दायर गर्ने तयारी गरेका छन्। कास्की अदालतले सूर्यदर्शन सहकारी ठगी प्रकरणमा ६५ लाख धरौटी माग गरेको थियो। उक्त आदेशलाई बदर गर्दै साधारण तारेखमा छाड्ने मागसहित उनले उच्च अदालत पोखरामा रिट दायर गर्न लागेका हुन्।
पाटन र तुलसीपुर उच्च अदालत जाने तयारी
पोखरामा रिट दायर गरेपछि रवि लामिछाने उच्च अदालत तुलसीपुर र उच्च अदालत पाटन जाने तयारीमा छन्। काठमाडौं जिल्ला अदालतले उनलाई ६० लाख धरौटीमा छाड्ने आदेश दिएको थियो। तर, उनले सो आदेशलाई चुनौती दिन उच्च अदालत पाटन जाने भएका हुन्।
त्यस्तै, रुपन्देही अदालतको एक करोड धरौटी आदेशविरुद्ध पनि उच्च अदालत तुलसीपुरमा पुनरावेदन दिने तयारीमा रहेका छन्।
थप कानूनी संघर्षको तयारी
सहकारी ठगी प्रकरणमा फसेका रवि लामिछानेले विभिन्न जिल्लाका अदालतका आदेशहरूप्रति असन्तुष्टि जनाउँदै उच्च अदालतसम्म कानूनी लडाइँ लड्ने योजना बनाएका छन्। उनले हरेक मुद्दामा अदालतको धरौटी आदेशलाई चुनौती दिँदै न्यायका लागि लड्ने आफ्नो अडान दोहोर्याएका छन्।
यो मुद्दा देशभरका सहकारी पीडित र कानूनी प्रक्रियाप्रति चासो राख्नेहरूका लागि चासोको विषय बनेको छ। रवि लामिछानेको यो कानूनी संघर्ष आगामी दिनमा कसरी अघि बढ्छ भन्ने प्रतीक्षा सबैले गरिरहेका छन्।
